ଟି-୨୦ ବିଶ୍ୱକପ ପୂର୍ବରୁ ପାକିସ୍ତାନକୁ ଶକ୍ତ ଧକ୍କା

ଭୁବନେଶ୍ୱର : ପାକିସ୍ତାନ କ୍ରିକେଟ୍ ଟିମ୍‌କୁ ଟି -୨୦ ବିଶ୍ୱକପ ପୂର୍ବରୁ ଏକ ବଡ଼ ଅସୁବିଧାର ସମ୍ମୁଖୀନ ହୋଇଛି। ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ଏକ ନେଟ୍‌ ପ୍ରାକ୍ଟିସ୍‌ ବେଳେ ଦଳର ଷ୍ଟାର୍ ବ୍ୟାଟ୍ସମ୍ୟାନ୍ ଶାନ୍ ମାସୁଦଙ୍କ ମୁଣ୍ଡରେ ଆଘାତ ଲାଗିଛି, ପରେ ତାଙ୍କୁ ସ୍କାନ୍ ପାଇଁ ଡାକ୍ତରଖାନା ନିଆଯାଇଛି। ମହମ୍ମଦ ନୱାଜଙ୍କ ଏକ ସଟ୍‌ ଯାଇ ମାସୁଦଙ୍କ ମୁଣ୍ଡର ଡାହାଣ ପାର୍ଶ୍ୱରେ ମାଡ ହୋଇଥିଲା। ଏହାପରେ ସେ ଆହତ ହେବା କାରଣରୁ ତାଙ୍କର ଚିକିତ୍ସା ଚାଲିଛି ।

ପାକିସ୍ତାନ କ୍ରିକେଟ ଟିମ୍ ଟି-୨୦ ବିଶ୍ବକପ୍‌ରେ ନିଜର ପ୍ରଥମ ମ୍ୟାଚ୍‌ ୨୩ ଅକ୍ଟୋବରରେ ଭାରତ ବିପକ୍ଷରେ ଖେଳିବ। ଗତ ମାସରେ ଇଂଲଣ୍ଡ ବିପକ୍ଷ ସିରିଜରେ ତିନି ନମ୍ବରରେ ବ୍ୟାଟିଂ କରିବାକୁ ଆସିଥିଲେ। ପାକିସ୍ତାନ ଦଳରେ ମାସୁଦଙ୍କ ପ୍ରତିଦ୍ୱନ୍ଦ୍ୱୀ ହେଉଛନ୍ତି ଫାଖର ଜମା। ଫଖର ମଧ୍ୟ ନିକଟରେ ଆହତ ଅବସ୍ଥାରୁ ସୁସ୍ଥ ହେବା ପରେ ଦଳକୁ ଫେରିଛନ୍ତି। ଉଭୟ ଖେଳାଳି ତୃତୀୟ ନମ୍ବରରେ ବ୍ୟାଟିଂ କରିବାକୁ ପ୍ରବଳ ଦାବିଦାର।

ସୋସିଆଲ ମିଡିଆରେ ଗୋଟିଏ ପରେ ଏକ ଭିଡିଓ ଭାଇରାଲ ହେବାରେ ଲାଗିଛି, ଯେଉଁଥିରେ ଶାନ୍‌ ମାସୁଦ୍‌ ଆଘାତ ଲାଗିବା ପରେ ତଳେ ପଡିଥିବା ବେଳର ଫୁଟେଜ୍ ରହିଛି। ତାଙ୍କୁ ଚାରିପଟୁ ଟିମ୍‌ର ସାଥୀ ଖେଳାଳି ଘେରି ହୋଇ ରହିଥିବାର ଦେଖିବାକୁ ମିଳିଥିଲା। ଟିମ୍‌ର ମେଡିକାଲ ଷ୍ଟାଫ୍‌ ତାଙ୍କୁ ପ୍ରାଥମିକ ଉପଚାର ଦେଉଥିଲେ। ତେବେ ପରେ ତାଙ୍କୁ ହସ୍ପିଟାଲ ନିଆଯାଇଥିଲା। ୩୩ ବର୍ଷୀୟ ମାସୁଦ ୧୨ଟି ଟି-୨୦ ଇଣ୍ଟରନ୍ୟାସନାଲ ମ୍ୟାଚ୍‌ରେ ମୋଟ ୨୨୦ ରନ୍ କରିଥିଲେ। ଏହି ସମୟରେ ତାଙ୍କର ଷ୍ଟ୍ରାଇକ୍ ରେଟ୍‌ ୧୨୫ ଥିଲା। ମାସୁଦ୍ ଟି-୨୦ ଇଣ୍ଟରନ୍ୟାସନାଲ କ୍ରିକେଟରେ ଏପର୍ଯ୍ୟନ୍ତ ଦୁଇଟି ଅର୍ଦ୍ଧଶତକ କରିଛନ୍ତି ।